ബ്രസൽസ്: പശ്ചിമേഷ്യൻ സംഘർഷത്തെത്തുടർന്ന് രാസവളത്തിന് വില കുത്തനേ ഉയരുന്ന സാഹചര്യത്തിൽ കർഷകരെ സഹായിക്കാൻ നടപടിയുമായി യൂറോപ്യൻ യൂണിയൻ രംഗത്ത്.
യൂറിയ, അമോണിയ പോലുള്ള പ്രധാന രാസവളങ്ങളുടെ ഇറക്കുമതി തീരുവ വെട്ടിക്കുറച്ച് -കർഷകർക്ക് ആശ്വാസം നൽകാനാണു തീരുമാനം. അംഗരാജ്യങ്ങളിലെ രാസവളം നിർമാണം കൂടുതൽ ശക്തമാക്കാനും തീരുമാനിച്ചിട്ടുണ്ട്.
കൂടുതൽ ഉത്പാദിപ്പിക്കാനും ആശ്രിതത്വം കുറയ്ക്കാനുമുള്ള ശ്രമങ്ങൾ യൂറോപ്പ് അടിയന്തരമായി ആരംഭിക്കേണ്ടതുണ്ടെന്ന് കൃഷിക്കായുള്ള യൂറോപ്യൻ കമ്മീഷണർ ക്രിസ്റ്റഫെ ഹാൻസെൻ അഭിപ്രായപ്പെട്ടു.
കൃഷി പ്രോത്സാഹിപ്പിക്കാൻ ശക്തമായ നടപടികളുണ്ടാകുമെന്നും അദ്ദേഹം വ്യക്തമാക്കി.